Kryeministri i Shqipërisë, Edi Rama, ka zgjedhur këngëtaren shqiptare, Dua Lipa, si “shoqëruesen” e tij gjatë fushatës elektorale. Ndryshe nga demokratët, që “himn” elektoral kanë yllin australian Sia, Rama ka ndarë sot një video ku vëmendjen kryesore e ka shqiptarja Dua Lipa, fituese e “Grammyt” për Albumin më të mirë.
Në video, kryeministri Edi Rama shihet në makinën e tij, ndërsa në dorë ka një iphone 8, dhe shkruan: Me Dua Lipën, rrugës për Fier… Por çfarë thotë pasazhi i shpërndarë nga Rama? Rastësi ose jo, Rama ka shpërndarë vargjet e këngës ku Dua thotë “Ne nuk kemi për qëllim të jemi si gjumi dhe kokaina, pra të biem dakord të ndjekim rrugët tona të ndara”.
Më shumë sesa një shoqëruese e rrugës për në Fier, teksti i Dua Lipas duket se është zgjedhur nga Rama edhe si një përgjigje për kundërshtarët e tij politikë. “Gjumi” është fjala me të cilën ai sulmon Lulzim Bashën, ndërsa “kokaina” është akuza më e fortë që i vjen në këtë fushatë nga kryetarja e LSI-së, Monika Kryemadhi, e cila deklaroi 3 netë më parë se kryeministri harxhon shuma të mëdha për konsumimin e saj. Video do të kishte qenë më e gjatë, nëse kryeministrit Rama nuk do i binte telefoni, për të ndërprerë më pas dhe videon e publikuar prej tij.
