Qytetarët e Vlorës do të përballen me mungesë të furnizimit me ujë të pijshëm për 24 orë, si pasojë e punimeve që po kryhen në kuadër të ndërtimit të ujësjellësit të ri të qytetit.
Sipas njoftimit të shpërndarë nga Ujësjellës Kanalizime Rajoni Vlorë, ndërprerja do të nisë të martën, më 27 maj, në orën 09:00 dhe do të zgjasë deri në mëngjesin e së mërkurës, 28 maj. Gjatë kësaj kohe, stacionet e pompimit do të jenë tërësisht jashtë funksionit, duke bërë të pamundur shpërndarjen e ujit në rrjet.
Autoritetet bëjnë thirrje për mirëkuptim nga ana e qytetarëve, duke theksuar se ndërhyrja është pjesë e një projekti të rëndësishëm për përmirësimin e furnizimit me ujë në gjithë territorin e bashkisë, përfshirë zonat urbane dhe periferi.
“Ky është një hap i domosdoshëm drejt ndërtimit të një sistemi modern dhe të qëndrueshëm të furnizimit me ujë,” thuhet në deklaratën zyrtare të UK Vlorë, e publikuar edhe në rrjetet sociale.
Qytetarëve u rekomandohet të marrin masa paraprake për të përballuar periudhën e mungesës së ujit.
