Rritja e çmimit të karburantit ka krijuar një trend të ri në Elbasan, atë të parkimit të makinës dhe lëvizjen në masë me bicikletë. Një trend i nisur në kohën e pandemisë , i cili ka marrë përmasa më të mëdha në kohën kur bota flet për krizë globale të hidrokarbureve.
Abaz Kovaci, riparues prej disa vitesh i bicikletave në Elbasan, pohon se qytetarët janë ndërgjegjësuar vitet e fundit duke nxjerrë dy rrotakët në lëvizje dhe kjo shihet nga kërkesat në rritje për ti blerë dhe riparuar.
Më besnikët e dy rrotakëve janë të moshuarit. Të pamundur të mbulojnë koston e karburantit i sheh në lëvizje me bicikletë. I tillë është 74 vjecari Osman Dauti nga lagjia Haxhias në Elbasan. Thotë se me bicikletë kryen të gjitha aktivitetet ditore.
Ndonëse i moshuar ai thotë se lëvizja me bicikletë e ka ndihmuar ta mbajë trupin në formë. 74 vjecari thotë se në një ditë arrin të përshkojë të paktën 10 km , ndërsa e ka dhe një mesazh për ata që e përdorin makinën edhe për të shkuar te kafja.
Pushteti lokal ka ndërmarrë nismën e të dielës së parë të muajit pa makina. Kjo nismë synon të ulë ndotjen në zonat urbane, por dhe një mënyrë për të kursyer karburantin. Ndaj kjo e dielë i ka takuar pedaluesve të bicikletave.
