Ashtu siç ishte paralajmëruar, që prej ditës së sotme, 1 qershor 2022 ndalohet përdorimi i qeseve plastike. Pra, nga sot ka hyrë në fuqi vendimi për heqjen nga qarkullimi i qeseve plastike.
Në rast përdorimi masa e gjobës shkon nga 500 mijë lekë të reja, deri në 1 milion e 500 mijë. Për “News 24” disa tregtarë janë shprehur pro ndërsa disa të tjerë nuk e shikojnë si një vendim të përshtatshëm.
“Nuk më duket vendimi i mirë, pasi qeset duhen. Të kesh qesen, e kuvendoj me të. E hedh plehrat atje ku janë për të hedhur. Bëhet pis vendi, ndaj quhet qesja. Megjithatë qeveria i di vetë këto punë”, u shpreh një qytetare.
Ndërkohë që një qytetare tjetër u shpreh se tregtarët duhet të kene qese letre.\
Vlen të theksojmë se ky ligj parashikon ndalimin e prodhimit, importimit dhe tregtimit të qeseve plastike mbajtëse si dhe qeseve plastike mbajtëse të oxo-degradueshme apo oxo-biodegradueshme me trashësi të mureve të qeses për çdo anë jo më pak se 70 mikron, me kapacitet mbajtës jo më pak se 10 kilogramë dhe me përmasa jo më pak se 50 cm gjatësia dhe 24 cm gjerësia. Kontrollet do të ushtrohen nga një sërë institucionesh, si nga Drejtoria e Doganave për ndalimin e importit të qeseve që s’përmbushin kriteret, Inspektorati i Mbikqyrjes dhe Tregjeve për kontrollin e tregtimit të tyre dhe Agjencia Kombëtare e Mjedisit për prodhuesit e qeseve nën parametrat e caktuar.
