Shoqata e gjyqtarëve ka bërë thirrje për t’u përshpejtuar procedurat për plotësimin e vakancave në Gjykaën e Lartë. Prej disa kohësh këto vakanca nuk po funksionojnë me kapacitet të plotë.
Gjyqtari Erion Bani, ka paralajmëruar se në këto kushte çështjet e shumë qytetarëve po zvarriten, por dhe shumë të dënuar do të fitojnë lirinë.
Në kategorinë e parë të përfituesve përfshihen shtetasit e huaj që janë në pritje të ekstradimit. Më tej, radhiten ata të paraburgosur për të cilët gjykatat e rretheve apo Krimet e Rënda kanë shpallur moskompetencën dhe presin vendimet e Gjykatës së Lartë.
“Nga këto raste, Gjykata e Lartë nuk mund të marrë një afat përfundimtar. Pasi kalojnë afatet, revokohen masat”, thotë Bani.
Për zgjidhjen e çështjeve emergjente nevojiten 6 gjyqtarë të lartë derisa Këshilli i Lartë Gjyqësor të shpallë hapjen e garës.
“Është e nevojshme që KLGJ të gjejë zgjidhje. Neni 46 e zgjidh, bëhet fjalë për transferime të përkohshme të gjyqtarëve që plotësojnë kushtet”, u shpreh Bani.
Numri i çështjeve të pagjykuara ka arritur në 32 mijë.
