Qeveria Shqiptare ka miratuar një vendim që autorizon Avokaturën e Shtetit të përzgjedhë një kompani të huaj juridike që të konsultojë qeverinë shqiptare për problemet e marrëveshjes koncesionare që ka me kompaninë ‘TIA’, që duhet të garantojë sigurinë në aeroportin ndërkombëtar të Rinasit.
Kjo kërkesë e qeverisë vjen tre javë pas grabitjes së ndodhur në aeroportin e Rinasit ku u morën miliona euro.
Sipas vendimit të Këshillit të Ministrave, Avokatura e Shtetit do të ngrejë një komision për procedurën e përzgjedhjes së zyrës. Komisioni iu ka bërë ftesë zyrtare zyrave më të njohura për ofertën. Kostot financiare për konsulencën do të mbulohen nga buxheti i shtetit. Ndërsa kontraktimi i zyrës së avokatisë së huaj do të bëhet përmes konkurrimit. Vendimi është botuar në Fletoren Zyrtare dhe ka hyrë në fuqi.
Dy javë më parë, presidenti i China Everbright pati një takim në Tiranë me Ministren e Infrastrukturës Belinda Balluku, e cila i ka kërkuar marrjen e masave shtesë për sigurinë e aeroportit, por ende nuk kanë kthyer një përgjigje nëse do t’i zbatojnë apo jo këto masa.
