Dy vjet pas premtimit të qeverisë për të arritur një rritje të pagave mesatare të administratës publike deri në 900 euro, me qëllimin për të ulur hendekun me vendet e rajonit, paga mesatare mujore bruto për administratën publike është rritur me 15% gjatë tremujorit të tretë të vitit 2024, duke arritur në 96,800 lekë, që me kursin e këmbimit aktual është rreth 987 euro.
Por megjithatë rajoni mbetet prapa pagave mesatare të administratave publike në disa vende të rajonit, si Serbia, Mali i Zi, Bosnjë-Hercegovina dhe Maqedonia e Veriut, ku paga mesatare është deri në 20% më e lartë, duke arritur deri në 1,400 euro në muaj.
Përveç kësaj, sektori privat në Shqipëri po has vështirësi në ndjekjen e këtij ritmi të rritjes së pagave.
Sipas Monitor, diferenca mes pagave në sektorin publik dhe atij privat ka arritur në 40%, nga 22% që ishte dy vite më parë. Rritja e pagave në sektorin privat ka qenë e dukshme kryesisht në sektorët që kërkojnë aftësi bazike, si pastrimi, ndërtimi dhe turizmi.
Kjo është për shkak të mungesës së fuqisë punëtore për shkak të emigracionit, por këto rritje nuk janë shoqëruar me një rritje të produktivitetit, duke krijuar një mjedis që nxit informalitetin dhe kërkon kontrolle të mëtejshme nga administrata tatimore.
Në nivelin e fuqisë blerëse, qytetarët po përballen me vështirësi për shkak të rritjes së çmimeve dhe shtrenjtimit të kostos së jetesës gjatë dy viteve të fundit.
Nëse pagat mesatare publike llogariten me kursin e këmbimit të dy viteve më parë (115 lekë për euro), paga mesatare do të ishte rreth 840 euro, që është 30% më e ulët se mesatarja rajonale.
