Rritja eksponenciale e rasteve me koronavirus sidomos në kryeqytet, ka detyruar sot autoritetet që të bëjnë një mbyllje të pjesshme të disa zonave të Tiranës, një ndër tyë cilat edhe ajo e ish-Bllokut, ku lokalet e saj do të penalizohen në këtë situatë.
Zv.ministrja e Shëndetësisë, Mira Rakacolli, ka njoftuar se Komiteti Teknik i Ekspertëve po vlerëson edhe mbylljen e pjesshme për aktivitete të lokaleve dhe bareve në zonën e ish-Bllokut në Tiranë, e konsideruar kjo si një vatër e lartë rreziku për përhapjen e COVID-19.
“Komiteti Teknik po vlerëson mbylljen e bareve e kafeneve në zonën e ish-Bllokut në Tiranë pas orës 22:00, duke qenë se, konstatohet një vatër rreziku e madhe potenciale nga grumbullimet në atë zonë gjatë orëve të natës”,- tha Rakacolli.
Sipas Rakacollit, situata në 2 javët e fundit paraqitet me një rritje të numrit të rasteve, të cilat përkojnë me hapjen e shkollave, bareve, restoranteve dhe njëkohësisht, me fazën e lehtësimit të masave shtrënguese.
Por jo më larg se sa dje, një prej mjekëve më të njohur në vend, imunologu Genc Sulçebe, konfirmoi një tjetër lajm të rëndësishëm për sa i takon përhapjes së koronavirusit në Tiranë.
Sipas tij, 10% e popullatës në nivel global, ka arritur të imunizohet nëpërmjet infektimit nga koronavirusi.
Imunologët thonë se, kjo shifër ndryshon në varësi të dendësisë së popullsisë duke i bërë kryeqytetet, vatrat më të mëdha të infeksionit, e për rrjedhojë edhe me një imunitet më të madh të popullsisë.
“Aktualisht në Tiranë ne jemi afër 20% ndërsa në rang vendi mund të jemi tek 10% akoma. Por kjo gjendje imunitare, është ende larg pragut të imunitetit kolektiv, asaj që quhet ‘imuniteti i tufës’, që duhet të jetë 60%”,- tha për mediat imunologu, Genc Sulçebe.
Ende nuk ka të dhëna të sakta rreth imunitetit që lë Covid-19 pas tejkalimit të sëmundjes, por ekspertët janë të mendimit se ai është i ngjashëm me “Sars-Cov-1” dhe “Mers-in”.
“Ndaj këtij virusi nuk kemi shifra të sakta por mendohet se, imuniteti dhe këtu do jetë i ngjashëm do ketë një zgjatje 1 deri në 2 ose me tepër vjet, pra duhet të jemi të qetë se pas kalimit të këtij infeksioni, ne kemi imunitet jemi të mbrojtur nga riinfektimet e mëtejshme”,- deklaroi specialisti shqiptar.
Nga ana tjetër, mjekët infeksionit kërkojnë rishikim të protokolleve të mjekimit veçanërisht për mjekët e familjes.
“Është momenti të rishikohen protokollet e në kushtet ambulatore dhe sjellja e çdo mjeku në përshkrimin e barnave për këta të sëmurë, pasi ka mbipërdorim të antibiotikeve dhe kortizonikëve në kushte ambulatore”,- tha më tej ai.
Shumica e të infektuarve po e kalojnë në mënyre asimptomatike, ose në gjendje të lehtë. Ata janë infektuar njëlloj si personat me shenja të sëmundjes.
/GazetaReforma.com/
