Ditën e sotme qeveria ka miratuar fondin e dytë për Korporatën Elektroenergjitike Shqiptare (KESH) për të siguruar likuiditet dhe për të përballuar importet e kushtueshme të energjisë elektrike. Në Fletoren Zyrtare është publikuar vendimi i Këshillit të Ministrave ku në dispozicion të KESH vihet pagesa e dytë prej 8 miliardë lekësh për të përballuar shpenzimet e furnizimit me energji.
Ky fond përballohet nga buxheti i vënë në dispozicion për sektorin energjetik në kushtet e krizës globale me firmë të zv.kryeministres Belinda Balluku.
Kjo është shuma e dytë që i është ‘kaluar’ KESH, ndërsa më herët me vendim të datës 29 korrik 2022, u miratua edhe pagesa e parë po ashtu, në vlerën 8 miliardë lekë. Ndërsa në total, deri më tani vlera e importeve të energjisë nga bursa ndërkombëtare nga janari deri më tani e ka kaluar shifrën prej 300 milionë eurosh. Ndërsa shuma pritet që të zbritet gjatë muajve në vijim, nëse vjeshta dhe dimri janë me shira.
Ndërkohë që për shkak të krizës elektrike, qeveria ka vendosur që prej 1 tetorit të gjitha familjet që konsumojnë mbi 800 kilovat në muaj do të paguajnë 42 lekë për çdo kilovat që harxhojnë më shumë dhe jo më 9.5 lekë/kilovati. Kjo shifër do të jetë e vlefshme për të gjithë ata që harxhojnë nën 800 kilovat në muaj.
