Rrugët e Athinës janë mbushur me mijëra student protestues ditën e sotme. Së bashku me mësues ata kanë protestuar kundër vendimeve të fundit të qeverisë greke.
Qeveria e Mitsotakis ka vendosur ndalimin e protestave me justifikimin e pandemisë, por ajo çka i shtyu më shumë studentët të dalin në rrugë, ishte vendimi per vendosjen e policisë në kampuset universitare. Të martën, qeveria njoftoi ndalim të protestave ku marrin pjesë më shumë se 100 vetë deri më 1 shkurt, si pjesë e masave për të ndaluar përhapjen e koronavirusit. Shkeljet dënohen me gjobë deri në 3,000 euro për individët që organizojnë tubime ose demonstrata dhe 5,000 euro për grupe ose organizata. Më shumë se 4 mijë persona demostruan ditën e sotme në Athinë, ndërkohë 1500 të tjerë mbushën rrugët e Thessaloniki-t. Ende nuk dihet nëse masat ndëshkuese do të zbatohen për këto protesta.
Partitë e majta opozitare me në krye SYRIZA-n e kritikuan vednimin si arbitrar dhe jodemokratik..
Greqia është në lockdown që prej nëntorit kur rastet me COVID e çuan sistemin shëndetësor në kolaps. Edhe pse masat kufizuese e ulën disi numrin e rasteve, qeveria nuk u tërhoq nga vednimi për të ndaluar tubimet. Kanë qenë të shumta rastet kur studentët në Greqi kanë nisur demostrata që nuk kanë përfunduar për muaj, kundër vendimeve neoliberale që dëmtonin arsimin.
