Qeveria e Kosovës ka hequr tarifën për lëndën e parë ndaj Serbisë dhe Bosnje e Hercegovinës dhe vendimi u mor në mbledhjen e fundit, e cila është mbajtur në distancë për shkak të Coronavirusit.
Ndërkohë, nga 1 prilli pritet që taksa të hiqet tërësisht.
Ndërkohë, mësohet se LDK nuk ka qenë e pranishme në mbledhje, teksa ministrat e Listës Serbe nuk kanë marrë pjesë në votim, duke abstenuar.
Ndërkohë, pas marrjes së këtij vendimi, ka reaguar edhe kreu i AAK-së Ramush Haradinaj, i cili me anë të një postim të bërë në llogarinë e tij në Facebook shkruan:
“Të nderuar qytetarë, Qeveria në largim nuk mundi të ikë pa e hequr taksën! Në pikën 1 hiqet taksa për lëndën e parë kurse në pikën 3 të vendimit obligon veten për heqje të plotë të taksës me 1 prill. Me këtë e zhvlerësoi kundërvlerën për marrëveshjen finale dhe e humbi plotësisht kreditin te partnerët ndërkombëtarë, e posaçërisht te SHBA-ja. Ashtu si e kishte fillimin e turpshëm, Qeveria në ikje gjithashtu po largohet me turp.”
Kujtojmë se prej muajsh Kurti po përballet me një situatë të pakëndshme sepse Richard Grenell, por edhe forcat politike në vend, i kanë kërkuar të heqë taksën ndaj Serbisë dhe Bosnje-Hercegovinës.
Në këto kushte, Kurti lajmëroi në muajin shkurt se ka vendosur të pezullojë përkohësisht taksën ndaj Serbisë dhe në rast se kjo e fundit nuk njeh pavarësinë e Kosovës, taksa do rikthehej.
Mirëpo, ky vendim u kundërshtua sërish nga SHBA, ashtu si edhe nga presidenti Thaçi apo partia me të cilën Vetëvendosja ka nënshkruar koalicionin qeverisës, Lëvizja Demokratike e Kosovës.
Kujtojmë se SHBA ka “kërcënuar” me anulimin e investimeve të kompanive amerikane apo edhe tërheqjen e trupave ushtarake nga Kosova në rast se nuk hiqet taksa.
Ndërkohë, ditët e fundit Kurti është përfshirë në një përplasje me LDK, pas shkarkimit të ministrit të Brendshëm Agim Veliu, të cilin e akuzoi se ka përhapur panik për gjendjen e krijuar në Kosovë pas goditjes nga COVID-19.
Menjëherë, LDK i ka dërguar ultimatum Kurtit, duke thënë se do të bëjë një “mocion mosbesimi” kundër qeveris, çka do rrëzonte automatikisht Kurtin nga pushteti dhe në bazë të Kushtetutës kjo çon në zgjedhje të parakohshme.
