Qeveria ka dorëzuar ditën e sotme në Kuvend një projektligj lidhur me daljen në pension të punonjësve të Shërbimit Informativ Shtetëror, me anë të të cilit synohet që të trajtohen me pension të parakohshëm të gjithë punonjët që mbyshin moshën 57 vjeç.
Të gjithë punonjësit që mbushin 57 vjeç dhe kanë 25 vite eksperiencë, do të trajtohen me 50% të pagës mujore neto deri kur të mbushin moshën e pensionit.
Sakaq, të gjithë ata që do përfitojnë nga ky ligj duhet të aktivizohen me 700 orë në vit, teksa në draft thuhet se dalja në pension të pakohshëm është me dëshirë të punonjësit të SHISH, por është parashikuar edhe e drejta e kreut të SHISH, për të shkarkuar punonjësit mbi 57 vjeç dhe ata që kanë 25 vite vjetërsi shërbimi.
Kriteret që duhet të vlerësojë kreu i SHISH janë pamundësia fizike e shëndetësore e punonjësit për të vazhduar karrierën e mëtejshme.
“Trajtimi financiar përfitohet me kërkesë të punonjësit ose kërkesë të titullarit të institucionit përkatës dhe miratohet nga Komisioni i Posaçëm. Përzgjedhja e përfituesve do të bëhet nga Komisioni i Posaçëm, sipas kritereve të moshës, të vjetërsisë në shërbim, aftësisë fizike të punonjësve dhe duhet të garantojë respektimin e parimeve të mosdiskriminimit, të objektivitetit, të transparencës dhe të paanshmërisë”, shtohet më tej.
Në fund shtohet se ngarkohet Këshilli i Ministrave që, brenda 3 muajve nga hyrja në fuqi e këtij ligji, të nxjerrë aktin nënligjore.
Projektligjin e plotë e lexoni duke klikuar KËTU
