Zbardhen detaje të reja nga ngjarja që ndodhi pak më parë në Bulqizë, ku një person i paidentifikuar qëlloi me armë zjarri drejt banesës së familjes Reçi.
Mësohet se kryefamiljari i kësaj familje është Klodian Reçi me detyrë Përgjegjës i Agjencisë së Sigurimeve Shoqërore, i cili ka telefonuar policinë dhe e ka njoftuar për ngjarjen e ndodhur përpara banesës së tij.
Sipas BallkanWeb pak para ngjarjes Reçi ka debatuar në telefon me një shtetas të identifikuar si Shpetim Kaja dhe të birin Rinoldin të cilët i kërkonin që të përshpejtonte procedurat për daljen në pension.Punonjësi ka thënë se për shkak situatës së Covidit ka qenë i karantinuar dhe kjo ka zgjatur procesin.
Por kjo nuk e ka shuar konfliktin dhe sipas punonjësit Rinold Kaja ka shkuar para banesës së tij dhe ka qëlluar me armë në ajër.
Ndërkohë policia dhe grupi hetimor kanë shkuar në vendin e ngjarjes dhe po punojnë për zbardhjen e plotë të rrethanave të ngjarjes dhe kapjen e autorit.
