Ngjarja ka ndodhur gjatë natës në autostradën Tiranë-Durrës, ku është qëlluar me breshëri plumbash drejt kompanisë farmaceutike CFO Pharma, në pronësi të Nadir Çaushollit.
Ky i fundit është lakuar shpesh në media për aktivitet të paligjshëm gjatë pandemisë, mashtrim financiar, probleme me drejtësinë dhe së fundmi në rrjete sociale për historitë e larmishme të dashurisë.
Mësohet se është tentuar që ngjarja e rëndë të fshihet. Sulmi me armë zjarri (rreth 20 plumba) ka ndodhur në 02:00 të natës, ndërsa policia është njoftuar rreth orës 08:10.
Pas denoncimit, një grup hetimor ka mbërritur në vendngjarje për të kryer ekspertizën e nevojshme dhe për të mbledhur prova.
Hetimet dhe dyshimet paraprake
Dyshohet se autorët kanë qëlluar nga një automjet në lëvizje, duke shkaktuar dëme materiale në fasadën e ndërtesës. Për identifikimin e tyre, autoritetet kanë sekuestruar pamjet filmike nga kamerat e sigurisë të zonës.
Në një njoftim për mediat, policia ka deklaruar:
“Rreth orës 08:10, në sallën operative të DVP Tiranë, ka ardhur njoftimi se në rrugën dytësore të autostradës Durrës – Tiranë, gjatë natës, dyshohet se është qëlluar me armë zjarri në drejtim të fasadës së një ndërtese. Nga të shtënat janë shkaktuar vetëm dëme materiale. Grupi hetimor, në drejtimin e Prokurorisë, po punon për identifikimin dhe kapjen e autorit/ëve dhe për zbardhjen e rrethanave të rastit.”
Aktualisht, nuk dihen ende motivet e sulmit dhe nëse ngjarja ka lidhje me ndonjë kërcënim të mëparshëm apo ndonjë tentativë grabitjeje. Policia po vijon hetimet për të zbuluar më shumë detaje mbi këtë incident.
