Policia e Shtetit dhe ushtria kanë ngritur 70 pika kontrolli në 8 qytete kryesore, pas urdhërit të djeshëm nga qeveria.
Patrullat deri më tani kanë evidentuar 100 persona, të cilët kanë ardhur nga Italia dhe nuk janë vetëkarantinuar.
Për këta persona, kryeministri Edi Rama paralajmëroi ditën e djeshme se do të gjobiten me 5 mijë euro.
Njoftimi:
Pika kontrolli për parandalimin e lëvizjes së personave që mund të jenë infektuar me virus. Që prej orëve të pasdites, forca policore speciale të FNSH-së, Patrullat e Përgjithshme dhe Forcat e Posaçme “Shqiponjat”, në bashkëpunim me patrulla ushtarake, kanë ngritur rreth 70 pika kontrolli në 8 qytetet kryesore dhe ato me risk të shtuar, për parandalimin e përhapjes së COVID-19.
Patrullat, të stacionuara apo të lëvizshme po vijojnë të kontrollojnë drejtuesit e mjeteve apo pasagjerët që ditët e fundit kanë udhëtuar në vendet e prekura gjerësisht nga Coronavirus. Për këta qytetarë parashikohet të vetëkarantinohen deri në 14 ditë, në të kundërt Policia do t’i gjobisë.
Në Shqipëri deri më tani është regjistruar një viktimë nga koronavirusi dhe 15 të infektuar.
Viktima e parë ishte një e moshuar nga Durrësi, e cila vuante nga sëmundje kronike dhe nuk i kishte treguar stafit të spitalit, se ishte kthyer nga Italia.
Qeveria ndërkohë ka marrë një sërë masash, për të parandaluar përhapjen e koronavirusit, që nga mbyllja e shkollave, lokaleve, anulimi i aktiviteteve sociale e kulturore.
Ministria e Shëndetësisë ndërkohë, vijon me thirrjet për qytetarët, që të qëndrojnë në shtëpi dhe të shmangin sa më shumë daljet.
