Një operacion i mirëorganizuar nga Komisariati i Policisë Nr. 1 në Tiranë ka çuar në sekuestrimin e një sasie të konsiderueshme droge, një armë zjarri me municion luftarak dhe arrestimin e dy shtetasve.
Operacioni, i koduar “Check Point”, u zhvillua mbi bazën e informacioneve të siguruara nga inteligjenca policore për persona që qarkullojnë të armatosur dhe të përfshirë në veprimtari të paligjshme me lëndë narkotike.
Gjatë ndërhyrjes në rrugën “Ali Demi”, shërbimet e Policisë ndaluan një automjet me dy persona në bord: drejtuesin K. K., 38 vjeç, dhe pasagjerin J. K., 34 vjeç, të dy banues në Tiranë.
Gjatë kontrollit fizik dhe më pas në banesën e K. K., policia gjeti dhe sekuestroi:
• 1 armë zjarri tip pistoletë
• municion luftarak
• 304 gram kokainë
• rreth 131 tableta ekstazi
• 3 peshore elektronike
• pjesë arme
• si dhe automjetin që përdorej nga të dy të ndaluarit.
Në përfundim të veprimeve procedurale, shtetasi K. K. u arrestua në flagrancë për veprat penale “Prodhimi dhe mbajtja pa leje e armëve, armëve shpërthyese dhe municionit” dhe “Prodhimi dhe shitja e narkotikëve”.
Ndërsa shtetasi J. K. u vu në pranga për veprën penale “Moskallëzimi i krimit”.
Materialet e sekuestruara dhe të gjitha provat i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për hetime të mëtejshme.
