Presidenti rus Vladimir Putin ka shpallur një armëpushim të përkohshëm për Pashkët në Ukrainë, njoftoi të shtunën Kremlini.
Sipas deklaratës zyrtare, armëpushimi do të jetë në fuqi nga ora 18:00 e së shtunës deri në mesnatën pas së dielës së Pashkëve, sipas orës së Moskës.
“Udhëhequr nga konsideratat humanitare, sot nga ora 18:00 deri në 00:00 nga e diela deri të hënën, pala ruse shpall armëpushimin e Pashkëve. Unë urdhëroj që të gjitha veprimet ushtarake të ndërpriten për këtë periudhë,” tha Putin gjatë një takimi me shefin e Shtabit të Përgjithshëm, Valery Gerasimov, sipas Shërbimit të Shtypit të Kremlinit.
Putin shtoi gjithashtu se “supozojmë se pala ukrainase do të ndjekë shembullin tonë. Në të njëjtën kohë, trupat tona duhet të jenë të gatshme për të zmbrapsur shkeljet e mundshme të armëpushimit dhe provokimet nga armiku, çdo veprim agresiv të tij”.
Njoftimi i armëpushimit përkoi me një tjetër zhvillim ushtarak të njoftuar nga Ministria ruse e Mbrojtjes, e cila deklaroi se forcat ruse kanë shtyrë trupat ukrainase nga një nga pozicionet e fundit në rajonin Kursk të Rusisë. Sipas ministrisë, ushtria ruse ka marrë kontrollin e fshatit Oleshnya, pranë kufirit me Ukrainën.
