Presidenti rus Vladimir Putin shprehu gatishmërinë për një armëpushim 30-ditor në Ukrainë, por theksoi se zgjidhja duhet të adresojë shkaqet themelore të konfliktit. Deklarata erdhi gjatë një konference për shtyp të zhvilluar pas takimit me presidentin bjellorus Alexander Lukashenko.
Putin vlerësoi angazhimin e presidentit amerikan Donald Trump në përpjekjet për zgjidhjen e konfliktit ukrainas, duke theksuar nevojën për një bisedë paraprake me të.
“Jemi dakord me propozimet për armëpushim, por qëndrimi ynë bazohet në supozimin se armëpushimi do të çonte në paqe afatgjatë”
Putin
Duke iu referuar vizitës së tij të një dite më parë në rajonin e Kurskut, udhëheqësi rus pohoi se situata atje është “plotësisht nën kontrollin tonë”. Ai shtoi se forcat ruse ndodhen në ofensivë në të gjitha pikat e frontit dhe se hapat e ardhshëm do të varen nga zhvillimet e shpejta në terren.
Nga ana tjetër, presidenti Trump e cilësoi deklaratën e Putin si “shumë premtuese”, pavarësisht se jo të plotë. Sipas Reuters, Trump shprehu gatishmërinë për bisedime me homologun rus për të garantuar armëpushimin. “Shpresojmë se Rusia do të bëjë gjënë e duhur”, u shpreh presidenti amerikan.
Putin nënvizoi se një armëpushim 30-ditor do të ishte më i favorshëm për Ukrainën sesa për Rusinë, por theksoi rëndësinë e adresimit të të gjitha çështjeve mes dy vendeve për arritjen e një paqeje të qëndrueshme.
