Vladimir Putin po synon të fajësojë kolegët e tij të vjetër në Byronë Federale të Sigurisë (FSB)- pasardhësja e agjencisë së inteligjencës KGB- për këtë moçal.
Putin thuhet se ka spastruar më shumë se 100 agjentë nga FSB- dhe qeveria e tij ka dërguar në burgim kreun e departamentit përgjegjës për Ukrainën.
Rreth 150 oficerë të FSB janë shkarkuar, raportoi të hënën gazeta Times e Londrës. Agjentët e larguar i përkisnin Shërbimit të Pestë, një divizion që Putini- asokohe drejtor i FSB, e krijoi në vitin 1998 me qëllim që të kryente operacione në vendet e ish-Bashkimit Sovjetik, duke synuar që t’i mbante ato shtete në orbitën e Rusisë.
Autoritetet e vendosën muajin e shkuar në arrest shtëpie Sergei Besedan, ish-drejtorin e Shërbimit të Pestë. Times raporton se ai është zhvendosur në burgun e drejtuar nga FSB, Lefortovo në Moskë. Ky burg përdorej për pyetje dhe tortura gjatë Spastrimit të Madh të Stalinit.
Kjo lëvizje është një sinjal shumë i fortë për elitat e tjera, thotë për Times, Andrei Soldatov, një ekspert i Qendrës për Analiza mbi Politikat Europiane.
“Jam befasuar nga kjo. Putini thjesht mund ta kishte shkarkuar ose ta dërgonte në një punë në Siberi. Lefortovo nuk është një vend i këndshëm dhe dërgimi i tij atje është një sinjal se sa seriozisht i merr Putini këto gjëra”.
Soldatov sugjeron se autoritetet ruse mund të kenë dyshuar se Beseda ka kaluar informacione te CIA.
Analistët kishin deklaruar më parë për Fox News se dënimi me arrest shtëpie për Besedan ishte një formë hakmarrje ndaj gabimeve të inteligjencës në Rusi.
Soldatov thotë se Shërbimi i Pestë përfaqëson departamentin më të ndjeshëm në FSB, që është përgjegjës për spiunazhin në Ukrainë. “Duket se Vladimir Putini më në fund e ka kuptuar se informacioni, që i kanë dhënë përpara pushtimit, nuk ka qenë i saktë. Dhe ai ka nisur të kërkojë dikë për ta fajësuar”.
Teksa trupat ruse po luftojnë në terren në Ukrainë, por Moska po lufton edhe një betejë inteligjence. FBI deklaroi se ka arritur të ndërpresë një sulm kibernetik rus që synonte SHBA-në dhe vende të tjera. Muajin e shkuar, inteligjenca ukrainase publikoi emrat e më shumë se 600 spiunëve rusë.
Kongresmeni Ritchie Torres i bëri thirrje FBI-së që të hetojë Shërbimin Diplomatik Rus, të vendosur në Nju Jork, ekspertët e të cilit thuhet se kanë ardhur me qëllim spiunazhi në SHBA.
