Presidenti i Rusisë, Vladimir Putin i ka drejtuar kritika të ashpra SHBA-ve për gjithçka që po ndodh në Afganistan. Duke folur të mërkurën në një takim me adoleshentët në qytetin lindor rus Vladivostok, për të shënuar fillimin e vitit shkollor, Putin tha se në 20 vite Amerika u mundua t’i impononte normat dhe standardet e tyre të jetesës, përfshirë organizimin politik të shoqërisë Afganistanit.
“Trupat amerikane ishin të pranishëm në atë territor (Afganistan) për 20 vjet, dhe gjatë atyre 20 viteve ata po përpiqeshin – kjo mund të thuhet pa ofenduar askënd – për të civilizuar njerëzit vendas, por në fakt, për të imponuar normat dhe standardet e tyre të jetës në kuptimin më të gjerë të kësaj fjale, përfshirë organizimin politik të shoqërisë”, tha presidenti rus.
Putin u shpreh se rezultati i vetëm ishin tragjeditë dhe humbjet për SHBA-të, por veçanërisht për njerëzit që jetojnë në territorin e Afganistanit.
“Rezultati i vetëm janë tragjeditë dhe humbjet për ata që e bënë atë – për Shtetet e Bashkuara – dhe veçanërisht për njerëzit që jetojnë në territorin e Afganistanit. Ky është një rezultat zero, nëse jo negativ. Është pamundur të imponosh diçka nga jashtë”, tha Putin.
Javën e kaluar, ai deklaroi se Rusia nuk do të ndërhynte në Afganistan dhe se Moska kishte mësuar nga pushtimi sovjetik i vendit. Moska zhvilloi një luftë 10-vjeçare në Afganistan që përfundoi me tërheqjen e trupave sovjetike në vitin 1989.
Putin gjithashtu është ankuar për vendet perëndimore që përpiqen të dërgojnë refugjatët afganë në shtetet e Azisë Qendrore aleate me Moskën, nga frika se “Islami radikal” do të përhapet në kombet me të cilët ai është miqësor.
Në të njëjtën kohë, Moska ka qenë optimiste me kujdes për udhëheqjen e re në Kabul, duke thënë se nuk do të ndërhyjë në punët e brendshme. Por në vend talebanët janë ende të regjistruar si një organizatë “terroriste”.
Rusia ka evakuuar qindra njerëz nga Afganistani dhe planifikon të nisë fluturimet e mëtejshme, ndërsa përfaqësuesi special i Putinit në Afganistan, Zamir Kabulov, tha javën e kaluar se ambasada e Moskës po punonte për të krijuar marrëdhënie me sundimtarët e rinj talebanë të Afganistanit
