Shkarkohet shefi i zjarrfikëses Policia e Mbrojtjes nga Zjarri dhe për Shpëtim (PMNZSH) në Gjirokastër, Kujtim Bizhga. Duket se situata e ditëve të fundit në Gjirokastër me djegien e qindra hektarëve tokë, pyje e kullota në Bashkinë Gjirokastër, si dhe humbja e jetëve të një çifti në fshatin Asim Zeneli, kanë qenë shkaqet e shkarkimit të Kujtim Bizhgës nga posti i shefit të PMNZSH së Gjirokastrës.
Ka qenë vetë propozimi i kryebashkiakut të Gjirokastrës, Flamur Golemi për këtë lëvizje në krye të zjarrfikësve, duke vendosur në krye gjeneral Pëllumb Shalarin me një eksperiencë në fushën ushtarake.
Katër ditë më parë, u regjistrua dhe vatra e fundit e zjarrit në fshatin e Gjirokastrës, Andon Poçi. Flakët janë përhapur me shpejtësi, ndihmuar nga era së madhe. Flakët e zjarrit janë në hyrje të fshatit, por temperatura e lartë dhe era ka bërë që flakët t’i afroket banesave të qytetarëve.
Ende nuk dihet se cili ishte shkaku i këtij zjarri, ndërkohë që në vendngjarje shkuan për ta shuar zjarrfikësit së bashku me forcat e policisë. Ata gjithashtu u ndihmuan edhe nga banorët e zonës me mjete rrethanore për të shuar flakët. Ndërsa ditën e sotme, me anë të një njoftimi, Ministria e Mbrojtjes theksoi se ka disa vatra aktive në mbarë vendin, por në Gjirokastër, nuk ka asnjë vatër me rrezikshmëri.
