Ish-presidenti i Amerikës, George Bush, si dhe ish-zonja e parë, Laura Bush, janë shprehur se ndjejnë trishtim të thellë për ngjarjet që po ndodhin në Afganistan. Në një deklaratë për mediat, Bush u shpreh se është i pikëlluar si për njerëzit afganë, ashtu edhe për ushtarët amerikanë, që kanë sakrifikuar shumë gjatë dy dekadave që kanë qenë me shërbim.
“Laura dhe unë kemi qenë duke parë ngjarjet tragjike që po shpalosen në Afganistan me trishtim të thellë. Zemrat tona janë të pikëlluara si për njerëzit afganë që kanë vuajtur aq shumë dhe për amerikanët dhe aleatët e NATO-s që kanë sakrifikuar aq shumë.
Rruga përpara për Afganistanin është ende e gjatë dhe e vështirë. Megjithatë, populli afgan duhet ta dijë se vendi i tyre nuk do t’u lihet kurrë terroristëve dhe vrasësve”, u shpreh mes të tjerash ish-presidenti amerikan.
Talebanët kanë marrë në pushtet të plotë Afganistanin pas plot 2 dekadash luftime! Dita e tretë e këtij ‘pushtimi’ shfaqet më e qetë. Fluturimet ushtarake që evakuojnë diplomatët dhe civilët kanë rifilluar në aeroportin ndërkombëtar të Kabulit, një ditë pas skenave kaotike.
Aeroporti është pika e vetme e daljes e hapur për forcat perëndimore nga Afganistani. Mijëra afganë u fotografuan në asfalt duke u përpjekur të largoheshin, ndërsa ndiqnin nga pas një avion. Të paktën shtatë persona vdiqën, përfshirë disa njerëz që u ngjitën në anët e një avioni kur ai u ngrit.
