Policia e Tiranës ka njoftuar se pasuria e sekuestruar në emër të Irma Hasanit, punonjëse e Shërbimeve Qeveritare, arrin vlerën e 750 mijë eurove. Kjo masë u miratua nga gjykata, në përputhje me kërkesën e prokurorisë së Tiranës, e cila firmosi sekuestro preventive për gjashtë pasuri dhe po aq automjete luksoze.
Prokuroria ka zbuluar se Irma Hasani ka punuar në ‘Drejtorinë e Shërbimeve Qeveritare’ që prej vitit 2011, me një pagë bruto prej 61,000 lekësh. Ajo nuk ka arritur të justifikojë blerjen e pasurive të paluajtshme dhe të luajtshme që ka realizuar. Gjatë verifikimeve, është evidentuar gjithashtu se vëllai i saj, Oltion Hasani, ka pasur të kaluar të dënuar në Angli.
Pasuritë e sekuestruara, me vlerë 750,000 euro, dyshohet se kanë origjinë nga veprimtaria kriminale e një 37-vjeçari. Operacioni, i koduar “Immediate”, është zhvilluar në kuadër të një procedimi penal të vitit 2024, i referuar nga Seksioni për Hetimin e Pastrimit të Parave në Policinë e Tiranës dhe në bashkëpunim me Prokurorinë e Gjykatës së Shkallës së Parë.
Ky operacion ka rezultuar në ekzekutimin e vendimit të gjykatës për sekuestrimin e pasurive në emër të shtetasve O. H., 37 vjeç, dhe I. H., 41 vjeç. Më konkretisht, janë sekuestruar 6 apartamente dhe 6 automjete. Sipas hetimeve, pasuritë e sekuestruara dyshohet se lidhen me veprimtari kriminale të O. H., i cili është dënuar për veprat penale të narkotikëve në Britaninë e Madhe në vitin 2020.
