Mund të mendohet si një skenë filmi, por jo, është çdo gjë reale dhe madje në vendin ku mund të mendosh se ke sigurinë më të lartë.
“Balkanweb” publikon fotot nga momenti i grabitjes së 10 milionë eurove në aeroportin e Rinasit.
Çdo gjë ka ndodhur rreth ores 15.00 kur në pistë, avioni që do të nisej për Vjenë, me rreth 160 pasagjerë në bord, është grabitur nga 3 persona.
Në pamje duket një person me syze por pa maskë në fytyrë, jelek të zi dhe pantallona të zeza, .
Ai ndodhet anash avionit, ku ndodheshin edhe paratë.
Para tij, ndodhet grabitësi tjetër, por me uniformë tjetër, teksa me armën e ngritur kërcënon punonjësit.
Të dy mbajnë në duar doreza.
Po kështu duken edhe bagazhet teksa futen në avion.
Këto janë pamjet e para, të qarta të ngjarjes dhe grabitësve brenda pistës në aeroportin e Rinasit.
Tre kanë hyrë brenda pistës dhe kanë marrë paratë, dy të tjerë kanë qëndruar në makinë.
Sapo kanë marrë paratë autorët janë larguar, por janë përballur me FNSH-të dhe policinë kufitare të Rinasit në një rrugë dytësore ku kanë shkëmbyer zjarr.
Nga shkëmbimi i zjarrit humbi jetën njëri nga grabitësit.
Trupi i tij u gjet pranë lumit në urën e Tapizës.
Ende po punohet për identifikimin.
Forca speciale policore si RENEA e FNSH, të ndihmuara nga një helikopter janë ende në ndjekje të autorëve të tjerë grabitjes.
Të angazhuara në operacionin e gjerë janë edhe forca nga Policia e Tiranës, Lezhës, Dibrës e Durrësit.
Ky është rasti i dytë i grabitjes së parave brenda pistës së aeroportit të Rinasit dhe i katërti i grabitjes së parave të bankave që shkojnë drejt Rinasit.
