Kreu i SPAK, Altin Dumani, ka sqaruar se operacioni i përbashkët antidrogë mes Shqipërisë dhe Italisë nuk ka asnjë lidhje me datën e zgjedhjeve të 11 majit në vend. Gjatë një konference për media, Dumani theksoi se data e ndërhyrjes është dakordësuar më herët me autoritetet italiane dhe me strukturën europiane Eurojust.
“Zhvillimi i operacionit nuk ka lidhje me zgjedhjet. Ne punojmë si një ekip dhe çdo veprim bëhet në bashkëpunim me partnerët. Ky operacion është ndërkombëtar dhe vijon si në Shqipëri ashtu edhe në Itali,” u shpreh Dumani, duke mohuar çdo ndikim të kalendarit politik në punën e prokurorisë.
Nga pala italiane, prokurorët kanë deklaruar se nuk kanë identifikuar asnjë provë që anëtarët e grupit kriminal të kenë përfituar nga ndonjë mbështetje politike.
Ndërkohë, prokurori i SPAK, Vladimir Mara, dha detaje mbi operacionin e gjerë të kryer në bashkëpunim me Prokurorinë e Barit. Sipas tij, janë lëshuar gjithsej 52 urdhër-arreste, prej të cilave 40 janë ekzekutuar në Shqipëri dhe Itali.
Në kuadër të këtij hetimi janë sekuestruar edhe pasuri të konsiderueshme: tre restorante në Durrës, një bar-kafe, gjashtë shoqëri tregtare dhe një televizion në qytetin e Vlorës. Gjithashtu, në një fazë të mëparshme të hetimeve janë bllokuar rreth 3 milionë euro para të gatshme, të cilat dyshohen se janë të ardhura nga aktiviteti kriminal i grupit.
Operacioni është mbështetur nga Interpoli, Zyra e Ekspertëve të Sigurisë në Tiranë dhe Policia Shqiptare, nën drejtimin e Drejtorisë Antimafia të Qarkut të Barit dhe SPAK-ut në Tiranë.
Grupi kriminal shqiptar, sipas autoriteteve, kishte shtrirje të gjerë në rrugët ballkanike dhe operonte me degë në drejtim të Evropës Veriore. Rajoni i Puglias në Itali shërbente si një pikë kyçe për hyrjen dhe shpërndarjen e narkotikëve në kontinent.
