Partia Demokratike hapi sot zyrtarisht fushatën elektorale në sheshin “Nënë Tereza” dhe ajo që ra në sy ishte fakti se pjesëmarrës nuk ishte aleati i saj, LSI. Rreth kësaj ka folur edhe Monika Kryemadhi në emsionin “Të paekspozuarit” e Ylli Rakipit. E pyetur nga gazetari Arjan Çani pse LSI nuk ishte në shesh, Kryemadhi ka thënë se sot ishte prezantimi i kandidatëve të PD, megjithatë dy partitë janë ende bashkë. Më tej ajo shtoi se kjo është një pyetje që i duhet drejtuar organizatorëve të PD dhe jo asaj
“Ishin kandidatët e PD-së që u prezantuan. A kemi dy vjet që jemi bashke? Bojkotuam zgjedhjet bashkë. Dorëzuam mandatet bashkë. Mund ta mbyllim fushatën bashkë. Kjo nuk është pyetjë për mua. Kur kam bërë konventën time kombëtare nuk e kam ftuar Bashën. Sot ai ka shpallur kandidatët e tij. Unë kam dy muaj që kam shpallur kandidatë nëpër zona. Po prit se ka edhe 30 ditë. Nuk është pyetje për mua, por për organizatorët“, ka thënë Kryemadhi.
Ajo më tej ka shtuar se do të ketë kohë që PD dhe LSI të dalin bashkë gjatë fushatës, ndërsa përdori metaforën e dasmës kur Çani e pyeti „Pse nuk ishin të ftuar krushqit?“
“Do të dalim, kemi fazën e dytë të fushatës…Dasma është në 25 prill. Kjo është drekë e dajave. Pyesni zotin Basha jo mua”, tha Kryemadhi.
