Lëvizja për Universitetin ka dalë kundër vendimit të Rektoratit të Univeristetit të Tiranës për mbajtjen e provimeve online. Në një qëndrim në rrjetet sociale, Lëvizja shkruan se provimet online vëështirësojnë arritjen e rezultateve të merituara dhe thellojnë diskriminimin për studentët në nevojë.
Ata gjithashtu i bëjnë thirrje qeverisë që të sigurojë infrastrukturën e nevojshme për mbajtjen e provimeve në klasa dhe zgjatjen e në kohë të sezonit, duke shmangur grumbullimet.
Sipas LPU “me një vendim të tillë, rektorati i UT shfaq përsëri hendekun e thellë që ekziston mes burokracisë dhe studentëve, shqetësimet e të cilëve gjithnjë injorohen, ndërkohë që vazhdimisht kërcënohen nga fajdexhinjtë nëse nuk paguajnë haraçet në formën e tarifave studentore.”
Qëndrimi i plotë:
PROVIMET NUK BËHEN ONLINE!
Pas më shumë se thuajse një viti zhvillim online të mësimit, ku pjesa më e madhe e studentëve e kanë pasur të pamundur ose të vështirë qasjen në internet dhe aparaturat e nevojshme teknologjike, rektorati i UT ka marrë vendim që edhe provimet të zhvillohen në të njëjtën mënyrë. Këto provime jo vetëm që vështirësojnë arritjen e rezultateve të merituara, por mbi të gjitha thellojnë diskriminimin ndaj studentëve në nevojë.
E vetmja mënyrë për të shmangur diskriminimin ekonomik ndaj pjesës më të madhe të studentëve, mbetet zhvillimi i provimeve në klasa. Për shkak të situatës të pandemisë, qeverisë dhe universiteteve u lind detyrimi të sigurojnë infrastrukturën dhe të ndërmarrin me kujdes masat e nevojshme, ndërsa sezoni duhet të zgjatet në kohë në mënyrë që të shmangen grumbullimet. Ndryshe, ashtu siç po ndodh gjatë mësimit online, shumësia e studentëve nuk do kenë mundësi as të marrin pjesë në provime ose nuk do të jenë në kushte të përshtatshme për t’i zhvilluar ato.
Me një vendim të tillë, rektorati i UT shfaq përsëri hendekun e thellë që ekziston mes burokracisë dhe studentëve, shqetësimet e të cilëve gjithnjë injorohen, ndërkohë që vazhdimisht kërcënohen nga fajdexhinjtë nëse nuk paguajnë haraçet në formën e tarifave studentore. Si gjithmonë, “të zgjedhurit” në postet drejtuese i shërbejnë më shumë qeverisë sesa universitarëve.
Ne, të gjithë së bashku si studentë, duhet të këmbëngulim për anulimin e tarifave, rimbursimin për paketat e internetit dhe zhvillimin e provimeve në klasa. Universiteti nuk është treg dhe studentët nuk janë klientë.
Për Universitetin!
Për Shoqërinë!
https://www.facebook.com/651561178215203/posts/3633549166683041/
