Ministrja e Arsimit, Besa Shahini, nëpërmjet një video-mesazhi ka bërë me dije se provimet e maturës nuk do të shtyhen për shkak të koronavirusit.
Ajo u shpreh se mësimi në RTSH do të vijojë edhe pas 23 marsit.
Ministrja tha gjithashtu se qeveria ka kërkuar nga RTSH, që të ketë një orë shtesë mësimi për maturantët, për lëndën e matematikës, kimisë dhe biologjisë, pasi konsiderohen si më të vështira.
Shahini bën me dije se nga ora 13:30 deri në 14:30 nga e hëna në të premte, do të ketë një orar shtesë.
PJESË NGA VIDEOJA:
PYETJE: A do të vazhdojë kjo nismë përtej datës 23 mars?
BESA SHAHINI: Jemi në diskutime me RTSH, për të vazhduar me dy oraret edhe në vazhdim.
PYETJE: A do të shtyhet testimi i maturës?
BESA SHAHINI: Për momentin nuk kemi arsye ta mendojmë se duhet të shtyhet. Jemi në shtëpi dhe është kohë shumë e mirë për të përsëristur. Kërkuar edhe një orar shtesë edhe për maturantët. Do kemi leksione të matematikës, kimisë dhe biologjisë, pasi konsiderohën si më të vëshirat nga vetë ata. Mos harroni nga ora 13.30-14.30 nga e hënë deri të premten do të keni një orar shtesë.
Deri më tani në Shqipëri janë regjistruar 38 të infektuar dhe një viktimë nga koronavirusi.
ISHP bëri me dije se 12 prej të infektuarve janë të shtruar te reparti i Infektivit, nga të cilët dy ndodhen në terapi intensive.
Të prekurit nga koronavirusi ndodhen në Tiranë, Durrës, Rrogozhinë, Lushnje, Fier dhe Elbasan.
Qarkullimi i makinave private ndërkohë është ndërprerë me urdhër të kryeministrit Edi Rama, ndërsa janë mbyllur shkollat, lokalet dhe fasoneritë.
