Ministrja e Arsimi, Besa Shahini u ka dhënë përgjigje shqetësimeve të studentëve për provimet e maturës dhe mësimit online.
Shahini theksoi, se në provimet e maturës, do të ketë vetëm pyetje nga klasa e 10-të, 11-të dhe nga klasa e 12-të deri në momentin që shkollat ishin ende të hapura.
Sipas saj, zhvillimi i koncepteve të reja në kushte shtëpie, është i vështirë për nxënësit.
“Siç ju kemi njoftuar, në testin e maturës nuk do të ketë pyetje, të cilat janë mbuluar gjatë kohës që kemi mësuar në kushte shtëpie. Pra, në testin e maturës do të kemi pyetje nga klasa e 10-të, 11-të, si dhe nga klasa e 12-të për temat që janë zhvilluar sa kemi qenë ende duke mësuar në shkollë. Kjo për arsye se e kuptojmë që zhvillimi i koncepteve të reja në kushte shtëpie është i vështirë. Jo të gjithë nxënësit kanë mësuar mbi temat e reja në tempo dhe me të njëjtën cilësi. Ndaj që të jemi të drejtë, kemi vendosur që t’i heqim këto nga testi i Maturës”, ka përsëritur Ministrja Shahini.
Ministrja iu përgjigj edhe pyetjes së një nxënësi për përdorimin e tabletave që ndodhen nëpër shkolla, për ata që nuk kanë kompjuter apo telefon smart.
Shahini tha se është e vështirë që tabletat të nxirren, pasi janë pronë e shkollës dhe kanë një sistem karikimi në klasë.
Ndër të tjera ajo shtoi se po negociohet me kompani të ndryshme, për t’u ardhur në ndihmë nxnësve që e kanë të pamundur ta ndjekin mësimin online.
“Janë rreth 60 shkolla që para shumë vitesh kanë filluar një projekt me disa tableta që kanë themeluar klasa digjitale. Pra, janë rreth 120 klasa digjitale dhe në ato shkolla nxënësit bëjnë lëndët e ndryshme duke përdorur edhe tabletin. Pra, është një formë tjetër e punës në kushte shkolle. Është e vështirë të nxirren ato tableta nga shkolla dhe t’u dërgohen nxënësve që nuk kanë një pajisje, sepse e para, ata janë pronë e shkollës dhe administrativisht është pak e vështirë, por këtë edhe do ta kishim tejkaluar disi. Praktikisht, është gati e pamundur sepse ato kanë një sistem që karikohen në një stacion brenda klasës, pra nuk kanë karikues mobil që ta çojnë në shtëpi. Dhe përderisa nxënësi nuk mund ta kthejë çdo ditë në shkollë për karikim, ai thjesht bëhet i papërdorshëm. Për fat të keq, kjo nuk është një mënyrë që mund t’u vijmë në ndihmë nxënësve që nuk kanë pajisje digjitale në shtëpi, por po bëjmë të pamundurën që në diskutim me kompani të ndryshme që janë ofruar edhe vullnetarisht të na vijnë në ndihmë, të gjejmë mënyrën më të mirë për të siguruar qasje në mësim digjital për të gjithë nxënësit”, vijoi ministrja.
