Qytetarët rusë e kanë kundërshtuar fuqishëm sulmin që qeveria e shtetit të tyre po bën ndaj Ukrainës.
Si pasojë e kryengritjeve dhe revoltave të shumta janë arrestuar2692 protestues që prej fillimit të luftës në Ukrainë.
Lajmi u konfirmua nga organizata ruse e mbrojtjes së të drejtave të njeriut “OVD”. Theksojmë se protestat kundër vendimit të presidentit Vladimir Putin për të pushtuar Ukrainën janë përhapur tashmë në 27 qytete ruse. Nga 2692 të arrestuar, 1370 prej tyre janë kapur në kryeqytetin rus Moskë. Nga ana tjetër, mediat e huaja shkruajnë se po bëhet akoma më e vështirë raportime për këto protesta pasi autoritetet ruse po kufizojnë aksesin në platformat e komunikimit online Facebook, Instagramdhe WhatsApp. Protestat kundër pushtimit të Ukrainës po zhvillohen në mbarë botën si: Madrid, Londër, Milano, Paris, Uashington, Frankfurt, etj.
Kujtojmë që Ministria e Mbrojtjes në Rusi ka kritikuar qeverinë ukrainase për shpërndarjen e armëve për civilët, duke thënë se kjo “do të çojë në mënyrë të pashmangshme në aksidente dhe viktima”.
“Regjimi nacionalist i Kievit shpërndan masivisht dhe në mënyrë të pakontrolluar armë të vogla automatike, granatahedhës dhe municione për banorët e vendbanimeve ukrainase,” tha zëdhënësi i Ministrisë së Mbrojtjes, gjeneralmajor Igor Konashenkov në një deklaratë të shtunën.
“Përfshirja e popullsisë civile të Ukrainës nga nacionalistët në armiqësitë do të çojë në mënyrë të pashmangshme në aksidente dhe viktima.”
