TIRANË– Keqtrajtimit i kafshëve të rrugës nga Bashkia e Tiranës ka bërë që qytetarë, adhurues të kafshëve, personazhe publike edhe aktivistë nga organizata Animal Rescue Albania (ARSA) të mblidhen në një protestë.
“Ku janë fondet” dhe “Vrasës, vrasës” ishin sloganet që protestuesit mbanin në dorë, drejtuar Erjon Veliajt.
Sipas tyre, kryebashkiaku i Tiranës nuk ka ndërmarrë masat e nevojshme për të mbrojtur kafshët e braktisura, apo për të parandaluar vrasjet e tyre në “Klinikën Veterinarë në Kombinat”.
Odri Veseli, e ardhur nga Italia, tha se në vend të sterilizimit dhe rivendosjes në territor Bashkia e Tiranës dhe spitali i Kombinatit zgjedhin mënyrën më të gabuar për t’i zhdukur qentë.
“Kjo gjë është shumë e gabuar dhe njëkohësisht dhe një keqpërdorim i taksës së qytetarëve. Tirana mbetet një qytet me reputacion të keq në lidhje me trajtimin e qenve të rrugës edhe pse një pjesë e mirë e qytetarëve po mundohen të lobojnë për të drejtat e tyre prej vitesh. Bashkia e Tiranës dhe Klinika Veterinare e Agjencisë për Mbrojtjen e Konsumatorit në lagjen Kombinat akuzohen nga aktivistët se i vrasin qentë e rrugës në vend që t’i ofrojnë atyre përkujdesje. Në protestë kishte shumë vullnetarë dhe familjarë të cilët ishin paraqitur së bashku me qentë e tyre të adoptuar pasi i kanë gjetur të braktisur apo të dhunuar.”
Endri Noti, aktivist, u shpreh :
“Ligji është aprovuar por ka ngelur vetëm në letra. Jemi këtu t’i japim zë atyre që nuk kanë zë”.
Gjithashtu, Sazan Guri i bëri thirrje Bashkisë së Tiranës të ndalojë vrasjet dhe dhunimet e qenve të rrugës në Shqipëri duke thënë se vrasjet “makabre” të spitalit të Kombinatit kanë arritur deri tek përdorimi i acidit të baterive dhe duke theksuar se kjo sjellje nuk është vënë re në asnjë shtet tjetër të Europës.
ARSA ka arritur, falë këmbënguljes, në formulimin dhe aprovimin e një ligji specifik për mirëqenien dhe mbrojtjen e kafshëve të braktisura në Shqipëri.
Më herët ‘Spitali Veterinar i Kombinatit’ është denoncuar nga qytetarë të ndryshëm, pasi nuk ka bërë sterilizimin e qenëve të rrugës.
