Organizatat mjedisore zhvilluan një protestë përpara Gjykatës së Lartë këtë të mërkurë, duke kërkuar pezullimin e menjëhershëm të punimeve për ndërtimin e aeroportit të Vlorës në zonën e mbrojtur Nartë-Vjosë. Sipas tyre, vonesa në zbardhjen e vendimit të Gjykatës së Lartë që kërkonte rishqyrtimin e çështjes në Apel po shfrytëzohet për të favorizuar vijimin e punimeve nga qeveria.
Protestuesit akuzuan qeverinë për përdorim elektoral të projektit, duke e konsideruar testimin e pistës së aeroportit si një “shfaqje elektorale të radhës” që, sipas tyre, synon të mbulojë favorizimin e interesave të oligarkëve të ndërtimit. Ata shprehën shqetësimin e thellë për faktin që puna po zhvillohet në një territor të mbrojtur nga ligji për biodiversitetin dhe kërkuan ndërhyrje urgjente të Gjykatës për të frenuar dëmet e mëtejshme mjedisore.
Protesta e organizatave mjedisore përfshiu gjithashtu kritika të forta ndaj Ministrisë së Turizmit dhe Mjedisit, duke e akuzuar këtë të fundit për heshtje dhe bashkëpunim në një projekt që, sipas tyre, shkel të gjitha normat e mbrojtjes së natyrës.
Në këtë kontekst, u rikujtua edhe tentativa e mëhershme e qeverisë shqiptare për të përfshirë në projekt aeroportin ndërkombëtar të Mynihut, një përpjekje që dështoi pasi autoritetet gjermane njoftuan në prill të këtij viti tërheqjen zyrtare nga çdo bashkëpunim për ndërtimin e aeroportit të Vlorës.
Organizatat kërkojnë që procesi të rihapet me transparencë dhe vlerësim të pavarur mjedisor, ndërsa theksojnë se çështja e aeroportit nuk është vetëm një projekt infrastrukturor, por një betejë për ruajtjen e pasurive natyrore dhe të drejtës publike.
View this post on Instagram
