Qeveria ka nisur rishikimin e ligjit të shpronësimeve, pas protestave të vazhdueshme në zonën e Astirit.
Ministrja e Infrastrukturës dhe Energjisë, Belinda Balluku, tha dje se është ngritur një grup pune, i cili do të dalë me një propozim konkret brenda muajit tetor, shkruan Panorama.
Më tej ajo shtoi se ky propozim do të nevojitet edhe për projektet e reja, ku një pjesë e rëndësishme e tyre kanë të bëjnë me shpronësimet.
“Besoj se brenda muajit tetor do t’u jepet një zgjidhje e mirëfilltë të gjitha proceseve të shpronësimeve që ne kemi dhe atyre që do të vijnë, pasi, siç e dimë, të gjitha projektet e reja që ne hapim, kanë gjithmonë një pjesë të madhe dhe të rëndësishme që ka të bëjë me shpronësimet, si nga ana e buxhetit, ashtu edhe nga ana e procedurave legale që krijojnë vonesa. Por ne tashmë kemi nisur një proces brenda qeverisë me disa nga aktorët dhe ministritë e përfshira për ta zgjidhur këtë problem njëherë e mirë dhe afatgjatë, kështu që kjo është shumë e rëndësishme”, u shpreh Balluku gjatë inspektimeve.
Përsa i përket investimit për ndërtimin e Unazës së Madhe, Balluku tha se përveçse do të lehësojë qarkullimin e mjeteve, do bëjë të mundur edhe rikualifikimin e zonave pranë të cilave kalon.
“Është shumë e rëndësishme që këtu nuk kemi të bëjmë thjesht me një rrugë për automjetet, por kjo është një zonë që rikualifikohet e gjitha. Kemi sistemimin e shtratit të Lanës, krijohet një pjesë për këmbësorët, pra, trotuaret janë një pjesë e rëndësishme e projektit dhe kjo nuk është thjesht një rrugë për t’u aksesuar nga automjetet, por do jetë një pikë ku të gjithë banorët e zonës, por edhe banorë nga zona të tjera mund ta aksesojnë”, vijoi më tej ministrja.
Projekti për pjesën lindore e Unazës së Madhe parashikon edhe hapësira të gjelbëra për qytetarët, trotuare, sistemimin e shtratit të Lanës dhe ndërtimin e 5 veprave të artit.
