Vijojnë protestat në Kazakistan që prej ditës së djeshme duke shkaktuar kaos në vend. Si pasojë e trazirave kanë humbur jetën 12 persona dhe janë plagosur 353 të tjerë. Gjatë natës, ushtria doli në rrugë dhe ndërmori një operacion kundër të gjithë atyre që plaçkitën qytetin dhe shkatërruan pronat.
Trazirat filluan kur çmimi i gazit dhe karburanteve filloi të rritet, por edhe çmimet e artikujve ushqimorë. Policia tha se godinat e administratës dhe policisë në Almaty ishin objektivi i sulmit dhe se pati një shkëmbim zjarri mes sulmuesve dhe pjesëtarëve të forcave të sigurisë dhe ushtrisë në vend.
Mediat e huaja raportojnë se Rusia po dërgon trupa me kërkesë të presidentit kazak. Ata do të vendosen në Kazakistaan për të ndihmuar në “stabilizimin” e vendit, i cili është anëtar i Organizatës së Traktatit të Sigurisë Kolektive (CSTO) së bashku me Rusinë, Bjellorusinë, Taxhikistanin, Kirgistanin dhe Armeninë.
Protestat shumë shpejt janë përhapur në gjithë shtetin, duke shfaqur mbështetje për protestat që kanë shpërthyer fillimisht në Mangastau. Në protesta janë përmendur edhe pakënaqësi lidhur me çështjet si korrupsioni, papunësia dhe pagat e ulëta. Sipas Ministrisë së Brendshme, më shumë se 200 persona janë ndalur gjatë protestave “në disa rajone” mirëpo vëzhguesit kanë thënë se shifra reale mund të jetë më e madhe. Ministria ka thënë se të paktën 95 persona janë plagosur në përleshje.
Për protesta është raportuar edhe në qytetet tjera të Kazakistanit si Aqtau, Zhanaozen dhe Oral, pavarësisht problemeve me internet, të cilat janë parë si tentime të autoriteteve për të kufizuar aftësinë e protestuesve për t’u mobilizuar.
