SPAK dhe GJKKO i kanë dërguar shkresa zyrtare Policisë së Shtetit dhe Ministrisë së Brendshme lidhur me protestën e zhvilluar dy ditë më parë në mbështetje të kryebashkiakut Erion Veliaj.
Në këto shkresa theksohet se protesta ka cënuar institucionet dhe ka ushtruar presion ndaj punonjësve të administratës.
Sipas raportimeve, protestuesit kanë bllokuar lëvizjen e fugonit të Drejtorisë së Burgjeve, duke krijuar pengesa në funksionimin e rregullt të institucioneve.
Përveç kësaj, është evidentuar vështirësia e lëvizjes së gjyqtarëve, të cilët, sipas SPAK dhe GJKKO, janë përballur me agresivitet dhe sulme verbale, ndërsa automjetet e tyre janë qëlluar nga protestuesit.
Gjithashtu, në shkresa theksohet se protestuesit kanë bllokuar ambientet e gjykatës edhe pas përfundimit të seancës, duke mos lejuar gjyqtarët dhe stafin administrativ të largohen.
Kjo situatë, sipas GJKKO dhe SPAK, ka cenuar sigurinë e tyre dhe ka vështirësuar vijimin normal të proceseve gjyqësore.
