Mijëra njerëz në të gjithë Poloninë protestuan në mbrojtje të lirive të medias të martën, duke kundërshtuar hartimin e legjislacionit që kritikët thonë se mund të mbyllë një transmetues në pronësi të Shteteve të Bashkuara, kritik ndaj qeverisë.
Parlamenti ka planifikuar të votojë për legjislacionin të mërkurën.
Votimi për të shtrënguar rregullat mbi pronësinë e huaj të mediave polake kërcënon marrëdhëniet me Uashingtonin dhe do të thellojë shqetësimin në Bashkimin Evropian mbi standardet demokratike në lindje të bllokut. Çështje të tilla si pavarësia gjyqësore dhe të drejtat LGBT e kanë sjellë Poloninë në konflikt me Brukselin.
Pamjet e TVN24 (televizon që preket nga ligji) treguan protestues në çatinë e Ministrisë së Kulturës në Varshavë me pankarta ku shkruhej “Media e lirë” dhe “Polonia pa fashizëm”.
Ndryshimi i Aktit të Transmetimit do të forconte ndalimin e firmave jo-evropiane që kontrollojnë transmetuesit polakë.
Ndërsa partia Ligji dhe Drejtësia (PiS) e Moraëiecki, që është aktualisht kryeministër i vendit, thotë se dëshiron të ndalojë vendet si Rusia ose Kina që të marrin kontrollin e transmetuesve polakë, kritikët thonë se synon të kapë TVN24, kanali më i njohur i lajmeve në Poloni, licenca e të cilit skadon më 26 shtator. Vetë televizioni e ka quajtur ligjin një tentativë për të kufizuar lirinë e medias.
