Ditën e sotme i afërmi i Jonadës ka prekur të gjithë protestuesit kanë dalë në shesh për të kërkuar drejtësi për 7-vjeçaren e përplasur për vdekje nga skafi i ish-policit Arjan Tase në Himarë. Ai ka marrë mikrofonin dhe ka falenderuar të gjitha mediat që janë të pranishme dhe që kanë bërë raportimin e protestës. Ai tha se në shesh është gjithashtu edhe daja i të voglës Jonada, por që nuk mund të flasë për shkak të dhimbjes së madhe që ka në shpirt.
“Dua t’ju falenderoj të gjithëve, unë jam kushëriri i dytë i Jonadës, kushëriri i parë i nënës së Jonadës, këtu mbrapa keni edhe dajën e Jonadës dhe nuk vjen të flasë sepse atë dhimbja që i mban shpirti atij…do ta keni të vështirë ta mbani. I falenderojmë të gjitha mediat për të gjithë punën e bërë, ju falenderojmë, Jonada kishte dy prindër, që i ka prapë, por tani Jonada ka gjithë shqiptarët prindër, është amaneti juaj, mbajeni dhe këtë e tregon gjithçka që kemi parë. Kjo protestë duhet të rritet për Jonadën dhe për të gjithë fëmijët që rriten të vjedhur, që mezi presin tu hipin gomoneve, jo për të vrarë njerëz, por për të vrarë veten oqeaneve të botës. Ju media e keni në dorë, mos prisni që fëmijët tuaj tu bëhen viktima. Tani të nisemi drejt Kryeministrisë,”- tha i afërmi i 7-vjeçares.
Kjo është hera e dytë që qytetarët dalin në shesh për të njëjtën arsye. Ngjarja e rëndë ndodhi më 2 gusht. Vogëlushja 7-vjeçare Jonida u përplas për vdekje nga një skaf që drejtohej nga ish-shefi i komisariatit të Himarës, Arjan Tase.
Kujtojmë se për këtë ngjarje të rëndë është pezulluar i gjithë zinxhiri drejtues i Policisë Kufitare të Vlorës, si edhe inspektorët përgjegjës, por protestuesit nuk janë mjaftuar me kaq. Ata kërkojnë dorëheqjen e ministrave Çuçi, Kumbaro dhe Nanos. Tase ka qenë ish-shef i Policisë në Himarë, ndërsa kur ndodhi ngjarja ai mbante postin e shefit të Policimit në Elbasan, por Gledis Nano e përjashtoi përfundimisht nga policia. Ai është lënë në burg.
