Ditën e sotme Aleanca për Mbrojtjen e Butrintit po zhvillon një protestë para Parlamentit.
Mazhoranca ka përcaktuar në rend dite të kalojë ligjin për dhënien me koncesion të Parkut Kombëtar të Butrintit.
Përfaqësues të Shqipërisë Civile së bashku me ambientalistin Sazan Guri protestuan para ambienteve të Kuvendit para nisjes së seancës plenare ditën e sotme.
Në seancën e sotme do të shqyrtohet projektligji për administrimin e nënzonave të trashëgimisë kulturore dhe peizazhit kulturor, pjesë e Parkut Kombëtar të Butrintit, ndërmjet Ministrisë së Kulturës dhe Fondacionit për Menaxhimin e Butrintit.
Protestuesit kërkuan shtyrjen e projektligjit për miratimin e kësaj marrëveshjeje. Ndërkohë që ambientalisti Guri shihet teksa kërkon të flasë me deputetin e PS-së Pandeli Majko. Por ky i fundit ia bën me dorë Gurit duke i lënë të kuptojë se po vazhdon rrugën.
Kujtojmë që [arku i Butrintit është “kurbani” i radhës i keqmenaxhimit të pasurive të vendit nga qeveria shqiptare.
Qeveria miratoi një marrëveshje me Fondacionin Shqiptaro- Amerikan të Zhvillimit për menaxhimin e Parkut Kombëtar të Butrintit në 10 vitet e ardhshme, sipas një plani, që parashikon mbrojtjen e Parkut dhe financimin nga AADF 5 milionë dollarë për këtë qëllim.
Kështu, fondacioni ka të drejtën për menaxhimin e Butrintit, për të përcaktuar çmimin e biletave dhe dhënien në përdorim të të gjitha formave të trashëgimisë dhe pasurisë kulturore. Tashmë qeveria shqiptare ka një projektligj për dhënien me koncension të Parkut Kombëtar të Butrintit. Në projektligj parashikohet dhënia përmes një marrëveshjeje nën administrim e Parkut Kombëtar të Butrintit një fondacioni të posaçëm, cili do krijohet mes Ministrisë së Kulturës dhe Fondit Shqiptaro-Amerikan për i Zhvillim, AADF.
