Në protestën e sotme përpara Bashkisë së Tiranës, qytetarët shprehën pakënaqësinë e tyre ndaj qeverisë dhe i ngritën gishtin e mesit kryeministrit Edi Rama.
Ndërkohë që opozita kërkoi largimin e kryebashkiakut të Tiranës, Erion Veliaj, dhe përballjen e tij me drejtësinë.
Koordinatori rajonal i Partisë Demokratike, Klevis Balliu, theksoi në fjalimin e tij se jeta në kryeqytet është bërë e papërballueshme për shkak të rritjes së taksave, të cilat sipas tij janë dyfishuar. Balliu i cilësoi pushtetarët si “të shoqatës” dhe u shpreh se kjo betejë është e qytetarëve dhe se në fund do të fitohet.
Sekretari i Përgjithshëm i Partisë së Lirisë, Tedi Blushi, po ashtu akuzoi qeverinë për përndjekje të opozitës, duke theksuar se Shqipëria ndodhet në një situatë emergjente politike dhe demokratike. Ai akuzoi liderët e sistemit të drejtësisë, përfshirë drejtuesit e SPAK, për përpjekje për të “instaluar diktaturën” dhe shërbim ndaj interesave të qeverisë kundër opozitës. Sipas Blushit, korrupsioni në Shqipëri është i qartë për publikun dhe përfshin projekte të mëdha si inceneratori i Tiranës dhe kulla të ndërtuara me financa të dyshimta, për të cilat, sipas tij, SPAK dhe prokuroria nuk po veprojnë.
