Andia Ulliri, deputete e Partisë Demokratike ka qenë pranë banorëve të Rinasit që prej fillimit të protestave.
Tashmë në mbështetje të tyre deputetja Ulliri ka ndërmarrë një hap tjetër.
Ajo i ka dorëzuar Kuvendit një shkresën për kërkesë informacioni drejtuar ARRSH dhe Ministrisë së Infrastrukturës dhe Energjisë mbi vendimin e lëvizjes me një sens në aksin Qafë-Kashar- Rrethrrotullimi Nënë Tereza – Ahmetaq.
Ishte vetë ajo qëe përmes një postimi në Facebook ka njoftuar për hapin e ndërmarrë në mbështetje të protestuesve të Rinasit.
Ulliri shprehet se duhet të bëhet rishikim i këtij vendimi, i cili penalizon banorët.
“Sot kam dorëzuar në Kuvend shkresën për kërkesë informacioni drejtuar ARRSH dhe Ministrisë së Infrastrukturës dhe Energjisë mbi vendimin e lëvizjes me një sens në aksin Qafë-Kashar- Rrethrrotullimi Nënë Tereza – Ahmetaq. Kërkesa e banorëve vazhdon të jetë e njëjtë. Rishikim të vendimit ku banorët e Rinasit nuk do të penalizohen dhe izolohen në sajë të lëvizjes në një sens drejtimi”, shkruan ajo.
Theksojmë se banorët e Rinasit po protestojnë për të tretën ditë radhazi. Rebelimi i tyre lidhet me vendimin për të devijuar lëvizjen drejt Aeroportit të Rinasit, duke e kthyer me një sens lëvizje, me drejtim nga Qafë Kashari-Rrethrrotullimi i “Nënë Terezës”-Ahmetaq.
Ata kanë bllokuar rrethrrotullimin pranë aeroportit të Rinasit, duke e përshkallëzuar kështu protestën dhe duke krijuar më tepër problematikë në qarkullim.
Ata kërkojnë që ARRSH të ndryshojë vendimin për kthimin e kësaj rruge me një sens lëvizje pasi ka penalizuar jetën e përditshme dhe nevojat e tyre bazike për të aksesuar shkollat, qendrat shëndetësore apo tokat bujqësore.
