Policia e Lezhës ka shoqëruar 33 persona pas protestave të banorëve të fshatrave Sang eThirrë kundër ndërtimit të HEC-it. Sipas policisë, personat e arrestuar kanë protestuar në mënyrë të paligjshmenë afërsi të tunelit të Kalimashit dhe kanë bllokuar lëvizjen e mjeteve në aksin Milot-Morinë. Ndaj tyre është filluar procedim në gjendje të lirë.
Njoftimi i plotë:
Organizuan grumbullim dhe manifestim të paligjshëm, penguan qarkullimin e mjeteve të transportit dhe nuk i’u bindën urdhrit të punonjësve të Policisë, shoqërohen në Komisariatin e Policisë 33 shtetas.
Specialistët për Hetimin e Krimeve në Komisariatin e Policisë Lezhë dhe Mirditë, në përfundim të veprimeve të kryera në lidhje me protestën e paligjshme të zhvilluar ditën e sotme, në fshatin Thirrë, Njësia Administrative Fanë, Mirditë , kanë filluar procedimin penal në gjendje të lirë ndaj 33 shtetasve.
Këta shtetas kanë protestuar në mënyrë të paligjshme në afërsi të tunelit të Kalimashit, në fshatin Thirrë, Mirditë duke bllokuar lëvizjen e mjeteve në aksin Milot-Morinë, si dhe nuk i janë bindur urdhrit të punonjësit të Policisë për të zbllokuar qarkullimin e automjeteve.
Materialet në ngarkim të tyre do t’i kalojnë Prokurorisë së Rrethit Gjyqësor Lezhë, për veprime të mëtejshme për veprat penale “Organizimi dhe pjesëmarrja në grumbullime dhe manifestime të paligjshme”, Pengimi i qarkullimit të mjeteve të transportit ” dhe ” Mosbindja ndaj urdhrit të punonjësit të Policisë së rendit publik “.
Banorët e fshatrave Sang e Thirrë në Mirëditë proestuan për të dytën herë brenda 10 ditësh për ndërtimin e HEC-it në këtë zonë dhe fabrikës së ujit. Ata gjithashtu kanë bërë kallëzim penal, pasi thonë se firmat e tyre janë falsifikuar pro ndërtimit të HEC-it.
