Ditën e sotme është zhvilluar protesta e pedagogëve, të cilët kanë listuar kërkesat e tyre ndaj qeverisë, ku kryesojnë pagat e larta si dhe më shumë mbështjetje financiare për kërkimin shkencor. Ndërkohë që kryetari i Partisë Demokratike, Sali Berisha teksa ka mbështetur për protestën dhe kërkesat e tyre pedagogët për rritjen e pagave, ka dënuar deklaratën e kryeministrit Edi Rama.
Gjithashtu Berisha e konsideroi përgjigjen e Ramës ndaj pedagogëve një qëndrim cinik, urrejtës dhe përçmues për kërkesat e tyre.
“Të nderuar deputetë, qoftë ne mblidhemi për një vlerësim për projektin e përgatitur nga grupi i punës i drejtuar nga zoti Bylykbashi për reformën territoriale, për të cilën kanë kontribute specialistë më të mirë, sekretariati i qeverisjes vendore, deputetë dhe specialistë të fushës. Para se të ndalem në këtë, dua të shpreh mbështetjen e plotë dhe totale të PD-së, për pedagogët, studentët dhe punonjësit e universiteteve që janë në protestë. Sot organizuan një protestë të fuqishme para Universitetit Politeknik, për kërkesat më legjitime te tyre. I garantoj se PD qëndron prapa dhe në mbështetje të çdo kërkese që ata sot i drejtojnë një qeverie arrogante, mashtruese dhe hajdute. Kërkesat e pedagogëve, punonjësve dhe studentëve, janë klithma të vërteta për të shpëtuar arsimin universitar në Shqipëri, që është në rrokullisje të madhe. Rama iu është përgjigjur me një qëndrim cinik, urrejtës dhe përçmues sindikatave të arsimit të lartë dhe kërkesave të tyre. Edi Rama ka hartuar një vendim në të cilin ai shpreh pikërisht arrogancën, shpreh cinizmin dhe përçmimin ndaj universiteteve si dhe kërkon të përçajë trupën akademike nga kolektivi studentor. Në vendimin e tij parashikon zero rritje buxhetore për rrogat. 10 % që deklaron ai, dje e kishte 10 sot e ka bërë 7 që nesër ta bëjë 10. Është më ulët se inflacioni i vërtetë, pra nuk përbën as indeksim, bën cinizëm. Ajo që është më e rëndë është se premton, 30 % tjetër rritje rroge nga tarifat e studentëve. Pra u thotë studentëve, familjeve të tyre, paguani ju tani për pedagogët e studentëve. Këtë nuk e bën kush në botë, përveçse ka qenë një formë në Jugosllavinë e Titos. nëse mbetet që pedagogët të paguhen me tarifat e studentëve, ato janë thjesht një iluzion. Bordet që përfaqësojnë qeverinë universitete, kanë zhdukur lirinë akademike dhe kanë vendosur universitetet në kontroll të plotë totalitar. me këtë rast i bëj thirrje çdo pedagogu, punonjësi, laboranti , studenti e familjari të mos përkulen para këtij qëndrimi arrogant të një njeri mashtrues që po i çon universitetet drejt shkatërrimit. Qytetarët të mbështesin këtë protestë, si kusht për të ruajtur universitetet si shtëpitë ku formohen intelektualë shqiptarë. Duke dënuar me ashpërsi më të madhe deklaratat që Rama bëri në UBT sot, bëj thirrje të vazhdohet kjo beteje, PD do të qëndrojnë fuqishëm në mbështetje të kërkesave të drejta.”, tha Berisha.
