Policia e Tiranës ka paralajmëruar opozitën se bllokimi i rrugëve është një vepër penale dhe se ata do të mbajnë përgjegjësi si administrative ashtu edhe penale.
Ky njoftim është dhënë pak para protestës të cilën opozita ka njoftuar se do ta zhvillojë në pesë akse kryesore. Policia e Shtetit ka theksuar se garanton të drejtën e tubimit dhe mbrojtjen e të drejtave dhe lirive të pjesëmarrësve, por pa cenuar lëvizjen e lirë të qytetarëve dhe automjeteve.
Në përgjigje të kërkesës nga Sekretari Organizativ i PD, Ervin Minarolli, Drejtoria Vendore e Policisë së Tiranës ka informuar se organizimi i tubimeve në disa segmente rrugore të kryeqytetit mund të krijojë probleme dhe mundësi për rrezikimin e rendit publik dhe sigurisë së shtetasve të tjerë.
Po ashtu, kjo do të pengonte qarkullimin e mjeteve të emergjencës, do të cenonte lirinë e lëvizjes së qytetarëve dhe do të shkaktonte vështirësi në qarkullimin e transportit publik dhe privat.
NJOFTIMI
Në Drejtorinë Vendore të Policisë Tiranë, Sekretari Organizativ i subjektit politik “Partia Demokratike e Shqipërisë” ka paraqitur kërkesën për zhvillim të tubimeve, nga ora 17:00 deri në orën 20:00 të datës 26.11.2024, në disa akse rrugore kryesore në Tiranë, konkretisht: Unaza e vogël, rrethrrotullimi i Zogut të Zi, ura afër xhamisë në Rrugën e Elbasanit, sheshi “Wilson” dhe nga pallati me shigjeta drejt Rrugës së Kavajës.
Në zbatim të germës “a” të nenit 6 të ligjit nr. 8773, datë 23.04.2001, “Për Tubimet”, Drejtoria Vendore e Policisë Tiranë i ka kthyer përgjigje subjektit politik se organizimi i tubimeve në disa segmente rrugore në bashkinë Tiranë krijon probleme dhe premisa për cenime të rendit publik dhe sigurisë së shtetasve të tjerë, pengon qarkullimin e automjeteve të emergjencës, cenon të drejtat dhe liritë themelore për lëvizjen e lirë të shtetasve, si dhe pengon lëvizjen e lirë të automjeteve të transportit publik dhe privat.
Gjithashtu, Drejtoria Vendore e Policisë Tiranë ka bërë me dije Sekretarin Organizativ të Partisë Demokratike se bllokimi i rrugëve është vepër penale dhe se për veprime në kundërshtim me ligjin, organizatori, drejtuesi i tubimit dhe pjesëmarrësit në tubim, do të mbajnë përgjegjësi administrative dhe penale, në zbatim të germës a, të nenit 24 të ligjit nr.8773, datë 23.04.2001 “Për Tubimet” dhe nenit 293 të Kodit Penal të Republikës së Shqipërisë.
Policia e Shtetit garanton të drejtën për tubim, të drejtat dhe liritë e pjesëmarrësve në tubime, por pa cenuar lëvizjen e lirë të qytetarëve dhe të automjeteve.
Për të ndihmuar qytetarët që do të qarkullojnë në akset rrugore të mësipërme, Policia e Shtetit ka ndërmarrë masa që në rast bllokimi, të devijojë qarkullimin e automjeteve në rrugë alternative.
Policia e Shtetit apelon dhe një herë për zbatim të ligjit dhe respektim të lëvizjes së lirë të qytetarëve dhe automjeteve, gjatë orarit të tubimeve.
