Flamur Noka, Sekretari i Përgjithshëm i PD-së së Rithemelimit , ka deklaruar se Charles McGonigal ka lobuar për të shpallur ish-kryeministrin Berisha non grata dhe ka akuzuar kryeministrin aktual Edi Rama si korruptues dhe i korruptuar. Në fjalën e tij në protestën e opozitës përpara Kryeministrisë, Noka e ka cilësuar këtë moment si një ndërprerje madhështore për projektin më të errët dhe skenarin më të zi të vendit në 33 vitet e fundit. Ai ka akuzuar Ramën për blerje votash, ndarje pasurie, favorizim të familjarëve dhe abuzim me fondet publike. Përkundër burgosjes së liderit të tyre, Sali Berisha, Noka ka thënë se opozita është ende e vendosur dhe ka refuzuar njohjen e Ramës si kryeministër, duke e cilësuar si person i korruptuar.
Noka gjithashtu ka bërë thirrje për ndryshime në pushtet dhe ka paralajmëruar se Edi Rama do të pësojë pasojat e veprimeve të tij. Ai ka theksuar se pushteti është i njerëzve dhe se institucionet që mundohen të kontrollojnë nuk do të mund të mbeten mbi vullnetin e popullit.
“Kjo ditë do të mbahet mend gjatë. Jemi të bindur se ky moment do të hyjë në histori me këtë vërshim madhështor, i cili ka si qëllim të ndërpresë, projektin më të errët, skenarin më të zi që i është kanosur vendit në këto 33 vite, planin ogurzi të Edi Ramës kundër pluralizmit.
Një person që qeveris prej 11 vitesh, që ka kapur të gjitha pushtetet, që blen votat, që ndanë pasuritë e vendit, që është në krye të çdo afere, që u jep miliona euro familjarëve, që udhëton si sheik me avion nga taksat tuaja, që bën një kopsht këtu 4 milionë euro. I bën thjesht jo për ju por për tekat personale. Sot me këtë vërshim madhështor, ky person është i vetmi që është i trishtuar sepse nuk ia doli dot të shkatërronte opozitën, ëndrrës për mbretërim.
Vëllezër, edhe pse na burgosi liderin tonë, me një proces politik dhe bandidesk dhe fund e krye pa prova, jemi për t’i thënë Edi Ramës se opozita është këtu. Edhe pse përdori McGonigal për non gratën politike të Sali Berishës, përsëri Edi Rama nuk ia doli të na nënshtrojë. Në atë dosje Rama rezulton edhe korruptues edhe i korruptuar. Ndaj i themi nuk të njohim më për kryeministër.
Ne jemi sot për t’i thënë atij se atë përfundim do të kesh, pa lavdi. Si ndëshkim që do të të japë populli që e tradhtove dhe e shkele me këmbë. Jemi këtu për t’i thënë se ky shesh do të paracaktojë fundit tënd. Këta njerëz janë dëshmitar që ti jo vetëm do humbësh privilegjet dhe zyrën, por që për ty do të nisë një periudhë e keqe, e papërballueshme. Do të japësh llogari për çdo cent që u ke vjedhur shqiptarëve. Sot jemi për t’i thënë se pushteti është i njerëzve, ndaj asnjë institucion që ti mundohesh të kontrollosh, nuk do dalë dot mbi pushtetin e njerëzve. Jemi sot më të bashkuar se kurrë, siç e keni kërkuar ju prej kohësh. Ne nuk ndalemi deri sa t’i sigurojmë vendit votën e lirë”, tha Noka ndër të tjera.
