Audiopërgjimet e SPAK zbulojnë një skemë të organizuar propagandistike ku kryebashkiaku i pezulluar Erion Veliaj, edhe nga ambientet e paraburgimit, ka orkestruar një fushatë mashtruese përmes mediave të afërta me të.
Në bisedat e përgjuara nga SPAK, Veliaj shfaqet duke udhëzuar persona të afërt që të konsultohen me Mero Bazen për të publikuar një informacion të rremë se “për kokën e tij” ishin paguar 2 milionë euro.
Përfshirja e gazetarit Mero Baze dhe e Carlo Bollinos, përmendur gjithashtu në përgjime, hedh dritë mbi ndikimin që ka pasur Veliaj në disa media të njohura, të cilat sipas dosjes, janë përdorur për të shpërndarë informacione të sajuara dhe për të krijuar një tymnajë rreth procesit gjyqësor.
Në një bisedë të datës 7 mars 2025 me vëllain e tij Arbër Veliaj, Erioni i kërkon që të marrë mendimin e “Meros” për të publikuar lajmin se është ofruar një shumë prej 2 milionë euro për dënimin e tij.
Ai përmend edhe tre “dëshmitarë” Dokushi, Isuf Berberi dhe Myslym Murrizi si mbështetje për këtë pretendim. Veliaj e quan këtë një “fishek” që mund të përdoret në strategjinë e tij mbrojtëse, ndërsa kërkon edhe këshillë nga Ajola dhe nga këshilltari i tij i vjetër, Endri Fuga.
Nga ana tjetër, Mero Baze, sipas përgjimeve, këshillon që një lëvizje e tillë do të ishte dëshpëruese dhe e pasaktë në formë.
Ai i sugjeron që së pari të bëhet një denoncim zyrtar, pastaj të dalin dëshmitarët dhe më pas të reagojë vetë Veliaj në media. Kjo tregon një përpjekje për ta inskenuar të gjithë procesin, nga krijimi i “lajmit” deri te ndërtimi i reagimit publik.
Ndërkohë, në media anonime e portale të lidhura me këtë rreth, filluan sulmet ndaj prokurorit të çështjes, Ols Dado, dhe gjyqtarit Erion Bani, duke i etiketuar si pjesë e një “klani grek” dhe duke përhapur informacione për gjoja lidhje të tyre me Greqinë dhe lobet e huaja. Qëllimi i këtyre sulmeve ishte të diskreditonin strukturat që po hetojnë Veliajn.
Përgjimet tregojnë qartë se lajmi për 2 milionë euro është një fabrikim i drejtuar nga burgu i Durrësit dhe se Veliaj ka përdorur mediat si armë politike për të ndikuar opinionin publik dhe rrjedhën e gjyqit ndaj tij.
Skema përfshin bashkëpunëtorë të afërt dhe figura të medias, me qëllim manipulimin e perceptimit publik dhe sulmin ndaj drejtësisë./CNA
