Ditën e sotme përpara Bashkisë së Durrësit, 205 familje të një pallati në lagjen Nr.17 janë mbledhur në protestë.
Ata shprehen, se pronari i pallatit të tyre, refuzon që të marrë përsipër dëmet e shkaktuara nga tërmeti i 26 nëntorit.
Kujtojmë këtu se kryeministri Edi Rama dha urdhër për të gjithë ndërtuesit e pallateve, që të marrin përsipër riparimin e dëmeve.
Në të kundërt shefi i qeverisë, tha se do të përballen me pasoja ligjore.
Në Durrës disa pronarë pallatesh kanë refuzuar ta bëjnë një gjë të tillë, duke deklaruar se kanë falimentuar.
Durrësi ishte një nga qytetet më të prekura nga tërmeti i 26 nëntorit.
Shumë pallate janë shpallur të pabanueshme, ndërsa mijëra qytetarë janë strehuar tek të afërmit dhe nëpër hotele.
Në bashki ndërkohë janë regjistruar 1900 kërkesa për bonus qiraje.
