Pronarët e lokaleve në Lunfomaren e Vlorës kanë dalë sërish në protestë mbrëmjen e sotme, duke bllokuar aktivitetin e tyre dhe duke mos ofruar asnjë shërbim. Megjithë vendimin se fasha orare për lejimin e muzikës deri në orën 23:00, ata sërish nuk janë dakord dhe kanë kërkuar një fashë orari të hapur.
Përfaqësuesi i Operatorëve Turistikë, Vasil Bedinaj tha për mediat se e mira është të shmangen furgonat e policisë në sy të turistëve. Ai u shpreh se ka shumë njerëz të mirë në Policinë e Shtetit, ndërsa shtoi se ka dhe nga ata që iu bën presion kryeministri dhe veprojnë.
“Të gjendet një bashkëpunim mes policisë dhe operatorët turistike. Të shmangim dhe të eliminojmë furgonat e policisë në sy të turistëve. Presim bashkëpunim me ta që të kemi një sezon të mbarë. Flasim për një fashë orari të hapur. Ka njerëz shumë të mirë në policinë e shtetit, por ka dhe nga ata që marrin vesh me presion. Ju bën presion kryeministri dhe veprojnë ata. Ju ka thënë merruni me lokalet“, tha Bedinaj.
Ai u shpreh se policia duhet të gjejë një formë bashkëpunimi me qytetarët dhe bizneset, ndërsa kërkoi që qeveria të marrë më tepër risk në mënyrë që ekonomia të ecë para.
“Nuk e meriton Vlora shfaqje të tilla, me furgona policie, skafandra. Drejtori i policisë duhet të gjejë një formë bashkëpunimi me qytetarët dhe bizneset. Qeveria po justifikohet se po e bën Greqia, Anglia.
Por ata kanë dhënë mbështetje maksimale për turizmin. Kështu që mos të bëjmë këtë krahasim. Qeveria duhet të marri më tepër risk që të ecë ekonomia”, tha Vasil Bedinaj.
