Prokurorja e Shkodrës Marjana Shtjefni është larguar nga sistemi i drejtësisë, duke paraqitur dorëheqjen pranë Këshillit të Lartë të Prokurorisë.
Këshilli ka vendosur me shumicë votash, mbarimin e statusit të magjistrales për Shtjefnin, raporton “Report Tv”.
Kjo e fundit nuk rezulton në asnjë prej listave me gjyqtarë dhe prokurorë të përzgjedhur, për t’iu nënshtruar vettingut.
Shtjefni ka ushtruar detyrën e prokurores nga viti 2002-2017, ku më pas ka marrë një leje prindërore 2-vjeçare.
Prokuroja është zhvendosur që në 2017-ën drejt Amerikës, për të kuruar vajzën.
Përsa i takon pasurisë, Shtjefni hyri në sistemin e drejtësisë pa pasuri të paluajtshme.
Në vitet 2010 dhe 2014, ajo ka dekalruar blerjen e dy apartamenteve, me vlerë totale prej 86 mijë eurosh, me të ardhurat nga paga e bashkëshortit, i cili ka punuar në ish-komunën Bushat.
Mësohet se gjatë mbledhjes për shqyrtimin e kërkesës së Shtjefnit, KLP ka shprehur shqetësimin për mungesën e prokurorëve nëpër rrethe.
Anëtarët e KLP kanë kërkuar shtimin e prokurorëve në Durrës, për shkak të intensitetit të madh të dosjeve, pas tërmetit të 26 nëntorit.
Më alarmante situata është në Mat, ku ka mbetur vetëm një prokuror.
Kjo situatë është krijuar pas fillimit të vettingut, ku më shumë se gjysma e prokurorëve të verifikuar, kanë rezultuar me probleme me pasurinë dhe pastërtinë e figurës.
KLP ka hasur në vështirësi edhe për delegimin e prokurorëve nëpër rrethe, për shkak të mungesës së vullnetit të tyre, pavarësisht shtesës prej 40% në pagë.
