Prokuroria e Krimeve të Rënda, ka tërhequr për hetim të gjitha dosjet në ndaj Leonard Dukës, njërit prej personave të shpallur në kërkim për vrasjen e ish-policit, Santiago Malko.
Leonard Duka është pronari i lokalit, ku dyshohet se u thur plani për ekzekutimin e Malkos, shkruan “Balkanweb”.
Në dosjet që prokuroria ka tërhequr është edhe ajo e prillit të 2019-ës, kur policia kishte marrë informacion se një grup personash të armatosur ndodheshin në katin e 12-të të një pallati në zonën e Medresesë.
Blutë ndërhynë dhe arrestuan Leonard Dukën, Oltian Logën, Elvis Gaçajn dhe Dritan Agajn.
Në mesin e fashikujve është edhe dëshmia e Trejsi Sejdinit, e cila rezulton të jetë e dashura e Leonard Dukës.
Ajo ka shpjeguar veprimet e kryera gjatë asaj dite dhe faktin që kishte folur në telefon me Dukën, të cilin e njihte prej dy vitesh, pasi ishte i fejuari i saj.
Sejdini tregon se sapo ka hyrë në banesë ka parë se aty ndodheshin 3 persona së bashku me Leonardin.
Më tej ajo ka shkuar të flejë, pasi ishte shumë e lodhur.
Kur është zgjuar në mëngjes ka qenë në gjumë dhe nuk e ka ndjerë Leonardin kur është ngritur.
Ky i fundit i kishte thënë të çohej, pasi kishte ardhur policia për kontroll.
Sejdini gjithashtu ka dëshmuar, se nuk ka pasur dijeni për fishekët dhe armën e zjarrit të gjetur jashtë pallatit.
