Pas bërjes publike të hetimeve të hapura nga ana e prokurorisë për protestuesit që kanë kryer akte të dhunshme gjatë protestës së sotme, kemi edhe të arrestuarin e parë.
Bëhet fjalë për ish- kreun e policisë Bashkiake dhe Inspektoratit Ndërtimor Urbanistik Vendor të Tiranës, Florenc Hoxha.
Shoqërimi ka lidhje me pjesëmarrjen e tij në protestën e opozitës, ku është fotografuar nga uniformat blu. Efektivët kanë ushtruar edhe kontroll në banesën e Hoxhës.
Gjithashtu mësohet se janë shoqëruar edhe persona të tjerë për incidentet e ndodhura sot në protestë, por nuk ka ende një numër të saktë të tyre.
Florenc Hoxha nuk është një emër i panjohur për prokurorinë dhe policinë pasi në vitin 2016 është dënuar me 1 vit e 4 muaj për “Shpërdorim detyre”, “Plagosje të lehtë” dhe “Kryerje të veprimeve arbitrare”.
Së fundmi, Hoxha është përfolur edhe për çështjen “Babale”, ku është marrë në pyetje nga Prokuroria e Krimeve të Rënda për shkak se ka regjistruar videon “Babale 2”, në të cilën shfaqet Alfred Alizoti me pretendimin se është shoqëruar në Prokurori nga numri një i Policisë së Shtetit Ardi Veliu.
Protesta e sotme e opozitës ishte paralajmëruar se do të ishte e qetë, madje ishte përgatitur edhe një program, mirëpo situata ka dalë jashtë kontrollit rreth orës 11:30, ku disa protestues arritën të çanin kordonin e policisë dhe të dëmtonin hyrjen parësore të institucionit.
Kanë qenë pikërisht këto veprime që e kanë shtyrë Prokurorinë që të nisë hetimet për të gjetur shkaktarët.
